Mga kabandera, pamilyar kamo ayhan sa istorya ni Sarah, asawa ni Abraham nga karakter sa Bibliya?
Sa sulod sang madamo nga tuig nga pag-updanay sang duha, indi sila sa gihapon magkabata apang sang naglab-ot si Sarah sa edad nga 90-anyos, nagbusong kag ginbun-ag sini ang isa ka bata nga lalaki nga ila gin-ngalanan nga Isaac.
Abi sang madamo, sa Bibliya lamang ini matabo apang sa nasambit nga istorya amo man ang natabo sa mag-asawa nga senior citizen nga nanday Gopichand kag Chandravati sa pungsod India.
Bangud sa luyag nila nga magkabata, nagkonsulta ang mag-asawa sa isa ka ‘in vitro fertility clinic’ kag matapos ang duha ka beses nga magpaidalum sa ‘in vetro fertilization’, nangin madinalag-anon nga nagbusong si Chandravati.
Nangin sensitibo man ang pagbusong ni Chandravati bangud sa iya nga edad apang nangin maluwas nga ginbun-ag sini ang ila nga “first born child” ukon ila pinakauna nga anak.
