Ginpasakaan na sang kaso nga paglapas sang Presidential Decree #449 ukon Cockfighting Law ang 77 ka mga persona nga nagkaladakpan sang tinalikdan nga Hunyo 13, sa Hda. Ma. Jose Brgy. San Isidro EB Magalona.
Suno sa kay Police Captain Eric Doronila, hepe sang EB Magalona PNP nga ginpang release naman ang ang 77 ka mga suspetsado matapos ang reglementary period kag regular filing na lang ang pagpasaka sang kaso.
Ila pa man ginatun-an nga magpasaka sang dugang pa nga mga kaso sa promoter sang pabulang kag indi pa mahingadlan ni Doronila mintras wala pa mapasaka ang kaso.
Ginsiling man ni Doronila ang posibilidad nga mapasakaan sang kaso ang 77 ka mga suspetsado kag ang promoter nga isa ka negosyante sang pagsupak sang mga gina patuman nga health protocols.
