Nangin kontrobersyal ang isa ka Buddhist temple sa Phetchabun Province, Thailand matapos magpositibo ang apat ka mongha sa drug test sadtong Miyerkules, Nobyembre 30.
Sandig sa report, nagpatigayon sang surprise drug testing kag raid ang mga kapulisan sa nasambit nga templo matapos sila makabaton sang impormasyon nga nagagamit sang iligal nga druga ang mga mongha sa templo.
Gindakup kag ginkakas sa “Buddhist monkhood” ang apat ka mongha matapos magpositibo sa drug test.
Sa karun, wala pa naghatag sang opisyal nga pahayag angut sa insidente ang monastic chief sa lugar apang ginsiling sini nga maga-assign sila sang bag-o nga mga mongha para may magbantay sa templo.
Ang mongha amo ang isa ka grupo sang mga pari nga naga-istar sa mga monasteryo agud mangamuyo kag magdebosyon.
via People.com
