Ginpahayag sang Philippine National Police nga isolated case lang ang nagluntad nga pagpangluthang sa Ateneo de Manila University kahapon nga adlaw, Domingo sa diin, tatlo ang napatay kag may iban nga napilasan.
Sa isa ka press conference ginsiling ni Quezon City Police Director PBGen. Remus Medina nga pagbalos ang nangin motibo sang suspek nga si Dr. Chao Tiao Yumol.
Ginsiling ni Medina nga madugay na nga gina-plano ni Yumol ang krimen.
Base sa inisyal nga pagpangusisa, nagsakay lang sang TNVS si Yumol pasulod sa Ateneo, kag matapos ginhimo ang krimen, nang-agaw pa ini sang salakyan para makapalagyo.
Ginpahayag ni Medina nga ang mga tawo ang naglagas kay Yumol matapos sini mabunggu-an ang mga naga-motor.
Nahibaluan man nga si Yumol ang wala sang permanente nga address sa Manila.
