Patay ang 62-anyos nga tiyo matapos ini ginlabo sang iya man lang hinablos sa Purok Magazine, Barangay Bago, banwa sang Don Salvador Benedicto las 3:00 kahapon sang hapon, Oktobre 31.
Base sa interview sang Radyo Bandera kay Capt. Eugene Tolentino, hepe sang DSB PNP nga bag-o lang nakapa-harvest ang suspek sa iya nga humayan kag may nabilin pa nga porsyon sang humayan nga ginapatubigan.
Ginpahayag sang suspek nga ginbalibagan siya sang biktima kag gin-hayu nga kung tani ang iban nga porsyon sang tubig ang didto mn makadto sa ila nga uma.
Bangud sini, nagbinaisay ang mag-tiyo nga nagresulta sa paglinab-anay.
Nakaangkon sang pilas ang suspek sa iya nga likod kag nagbalos sa iya nga tiyo kung sa diin, iya sini nalab-an sa li-og gamit ang dala nga sanggot.
Ang biktima nga tiyo ang ginkilala kay Melquizidict Baroy, 62 anyos samtang ang iya hinablos nga suspek amo si Eddie Mar Baroy, 30 anyos.
Nakahunong karon sa Don Salvador Benedicto PNP ang suspek.
Ginahulat pa sang kapulisan kong magapasaka bala ang pamilya sang biktima batok sa suspek.
