“Totally burned” ang isa ka puluy-an sa Barangay Tinongan, banwa sang Isabela, Negros Occidental matapos gintupok sang kalayo, pasado la-1:00 sang hapon, Huwebes, Marso 9, 2023.
Suno sa interview sang Radyo Bandera kay FO1 Alfonso Delos Sañez, arson investigator sang Isabela Bureau of Fire Protection, ginapanag-iyahan ni Danilo Malvan ang balay.
Sa panaysayon ni Malvan, naglakat sa gwa sang ila balay kag nalipatan sini ang iya ginsun-ad nga linuto sa ila kusina.
Ang utod ni Malvan nga si Eduardo nga nagakatulog sa balay ang nakibot bangud sang nagbugtaw ini, nakita niya nga dako na ang kalayo sa ila kusina nga himo sa kahoy.
Ang dapug sang pamilya Malvan ang himo sa lubi nga ginbutangan sang duta, suno kay FO1 Delos Sañez.
Himo ang balay sa kahoy nga may concrete kag ang ila atop ang katunga GI sheet kag ang katunga himo sa nipa, rason nga madasig ang pagdako sang kalayo, dugang pa ni FO1 Delos Sañez.
Tigayon man nga nakahingagaw gwa si Eduardo sa nagakasunog nila nga balay.
Kapin P45,000 ang danyos sang sunog.
Under investigation pa ang insidente agud mapat-ud gid kung ano ang gintunaan sini.*
