Kampeon ang team sang Creamline Cool Smashers sa ginpatigayon nga Premier Volleyball League All Filipino Conference Finals Game 3 nga ginhiwat sa Mall of Asia Arena kahapon, Huwebes, Marso 30, 2023.
Ginkilala naman bilang runner up ang team sang Petro Gazz Angels apang bronze ang F2 Logistics Cargo Movers.
Sa una nga set sang Creamline kag Petro Gazz, nakuha sang Angels ang kadalag-an sa scores nga 20-25.
Apang sa ika-duha tubtob ika-apat nga sets, ginpakita sang Creamline ang mabaskog nga opensa kag depensa, gani natapos ang match sa 25-15.
Nakuha naman sang duha ka teams ang mga dungog sa katapusan sang game.
Sa team sang Creamline ginpasidunggan sanday Jia De Guzman bilang Best Setter kag Finals Most Valuable Player; Tots Carlos bilang Best Outside Spiker kag Most Valuable Player; Jema Galanza bilang Best Outside Spiker kag Michele Gumabao bilang Best Opposite Spiker.
Sa pihak nga bahin, nakuha naman sang Angels nga sanday Remy Palma kag MJ Phillips ang Best Middle Blockers kag Kath Arado bilang Best Libero.
Sa pagsugod sang PVL sadtong 2017, wala pa maka-agum sang “no podium finish” ang Creamline.
Nangin kampeon ang Creamline sang anum ka beses, runner up sang duha ka beses kag 3rd placer sang tatlo ka beses.
Ang PVL All Filipino Conference ang ika-anum na nga season sang liga.*
