Wasak ang nawong sang 14-anyos nga dalagita sa probinsya sang Albay, nga ginapatihan ginlampusan sang bato, bangud posible nga nagbatu sa magahimulos kuntani sa iya.
Ulihi nga nakit-an ang dalagita, la 1:00 sang hapon, sang tinalikdan nga Huwebes, Agosto 17 nga nag-apas sa iya mga abyan agud magpanguha sang mga nagakalahulog nga bunga sang lubi.
Ginkulbaan ang mga ginikanan sang dalagita bangud wala ini makabalik kaupod sang iya mga abyan.
Ginpangita sang mga opisyal sang barangay ang dalagita sa diin una nga nasapwan ang mga panapton kag tsinelas sang biktima.
Nagpadayon sa pagpangita ang mga opisyal sang barangay tubtob sa sapa kag diri nadiskubrihan ang bangkay sang biktima nga wala na sang kabuhi.
Gintabunan pa sang bato kag hilamon ang lawas sang biktima.
Base sa autopsy report, nahibaluan nga wala matandog ang biktima, apang may posibilidad nga nagbatu sa magahimulos kuntani sa iya, rason kon nga-a ginpatay ini.
Wala na ginhingadlan ang biktima, bangud sang pangabay sang pamilya.*
