Nagapangatubang naman karon ang mga kunsumidor sang dugang nga palas-anon sa mataas nga plete kag presyo sang mga nagapanguna nga balaklon kag serbisyo matapos sang pagtaas man sang bili sang gasoline kag iban nga produktong petrolyo.
Nagdangat sa masobra P7 kada litro ang nagsaka sa gasolina kag iban pa nga petroleum products sa sulod lang sang duha ka bulan ukon walo ka semana.
Sini lang nga semana, nagpasaka ang mga lokal nga kompanya sang langis sang P1.50 kada litro sa presyo sang diesel kag P1.80 naman sa gasoline. Samtang ang kerosene ang may pagsaka sang P1.30 kada litro.
Ang walo ka semana nga saka sa gasoline ang nagsuma total na sa P7.20 kada litro. Sini lang nga tuig, may yara na sang net increase nga P19.70 kada litro sang gasoline.
Nagsugod nga magsaka ang pump prices sang nagsugod ang kalain sang tyiempo sa Gulf of Mexico rason nga nauntat ang produksyon sang petroleum products.
Gani, ang Department of Transportation (DOTr) ang nagalantaw nga maghatag sang fuel subsidies kag bulig sa pareho nga public utility drivers kag mga pasahero agud malikawan ang pagsaka sang plete sa pampubliko nga transportasyon.
Suno kay Transportation Secretary Arthur Tugade, ang DOTr ang nagapati nga indi pa ini insakto nga tion nga magpasaka sang plete, bangud nagatingwa pa sa gihapon ang mga mamumugon sa epekto sang mga closures kag restrictions sa mga negosyo kag obra.
Ginpahayag naman ni Senator Ping Lacson nga ang TRAIN Law nga ila ginpasar nagligad nga tinuig ang nagapahayag nga sarang masuspende sang Department of Finance (DOF) ang implemantasyon sang pagsaka sang excise tax sa gatong, paagi man sa rekomendasyon sang Development Budget Coordination Committee (DBC) sa idalum sang pila ka mga kondisyones.
“I therefore urge the DOF Secretary to exercise that option under the law, given the unabated increase of the prices of fuel resulting in a heavy burden on the transport sector and the public in general,” suno kay Lacson.*
