NEGROS OCCIDENTAL – Patay ang drayber samtang pilason naman ang back-rider sini matapos makabunggo ang ila ginasakyan nga motorsiklo sa naka-park nga truck sa national highway sang Zone 2, Barangay Patun-an sa banwa sang Calatrava, Negros Occidental, takna la 1:15 kaina sang kaagahon, Lunes, Nobyembre 21, 2022.
Dead on arrival sa Calatrava Municipal Hospital ang drayber nga si Christian Arellano, 18-anyos, residente sang Barangay Lalong sa Calatrava.
Samtang pilason ang back-rider nga si Larry Delima, 20-anyos, residente sang Brgy. Menchaca, Calatrava.
Sandig sa imbestigasyon, sakay sa itom nga Motoposh motorcycle nga may plate number FA 87763 ang duha ka mga biktima halin sa Barangay San Isidro padulong sa Calatrava proper.
Sang nakalab-ot sila sa kurbada nga bahin sang highway, sila ang nakabunggo sa buli sang Fuso nga self-loader truck nga may plate number NCR 7275, nga naka-park.
Nakarehistro ang truck sa ngalan nga Maxipro Development Corporation nga may company address nga 86 Apo Street, Sta. Mesa Heights Lourdes, Quezon City, NCR, Second District National Capital.
Ginkilala ang drayber sang truck kay Remegio Alegre Jr., 44-anyos, tumandok sang Kalookan City kag karon nagatiner sa Brgy. Patun-an sa Calatrava.*
