Utod nga kamot sang nagligad, utod nga tiil naman subong.
Nakasulod ang utod nga tiil sa plastic kag ginwigit sa atubang sang gasolinahan sa dalan CL Montelibano, Barangay Villamonte sa syudad sang Bacolod, takna las 2:50 sang aga, Miyerkules nga adlaw, Marso 29, 2023.
Ginkakugmat sang isa ka persona nga sa iya pagbukad sang transparent plastic, utod nga tiil gali ang unod sini.
May yara man sang papel nga nalakip sa utod nga tiil. May nakalista sa papel nga mga pangalan sang pila ka personalidad kag sang gin-alegar “smuggler protector”.
Sandig sa imbestigasyon, nagasakay sa motorsiklo ang suspect/s nga naghaboy sang plastic kung diin nakasulod ang tiil.
Matapos mabilin ang plastic, nagdiretso ang motorsiklo sa nasidlangan nga bahin sang dalan.
Gindala naman ang utod nga mga tiil sa Gegato Abelia morgue sa corner Lacson-Burgos Street sa syudad sang Bacolod.
Padayon pa nga ginatumod kun lalaki ukon babayi ang nagapanag-iya sang duha ka tiil.
Ang pag-utod sang tiil ang halin sa buko-buko.
Sa madumduman, kapareho ang insidente sa duha ka utod nga kamot nga ginlakot sa nilaga kag may listahan man sang pangalan sang mga persona nga gin-alegar may kaangtanan sa iligal nga droga nga nakit-an sang isa ka kolektor sang basura sa Purok Kagaykay, Barangay 2, syudad sang Bacolod sadtong Enero 25.
Nakasulod ang mga kamot sa container sang ice cream kun diin may yara ini sang sabaw, langka, kag batwan kaangay sang nilaga kag ginputos pa ini sa plastik kag karton.
Nagpakig-angut na karon ang hepe sang Bacolod Station 4 nga si P/Capt. Greeky Cayao sa Police Station 2 agud hibaluon kung konektado ang duha ka separado apang magkapareho nga insidente sang utod nga parte sang lawas sang tawo.*
