Patay ang isa ka iloy kag duha ka tuig sini nga bata sang maaksidente ang ila ginasakyan nga tricycle sa So. Inangtan, Brgy. Maquiling syudad sang Sagay.
Natabo ang insidente alas-3 sang hapon Martes nga adlaw Setyembre 14, 2021 sa diin ginkilala ang mga biktima nga si Roselyn Alcontin, 22-anyos kag anak sini nga si Jairon Kim Casipong duha ka tuig samtang pilason naman ang amay nga si Roland Casipong 27-anyos nga drayber sang tricycle.
Base sa inisyal nga report, papuli na kuntani sa Brgy. Minapasok, Calatrava ang magpamilya, samtang nagasunod ang ila tricycle sa isa ka de pampasahero nga salakyan kag sang magtinguha nga mag-overtake si Roland na alang-alang ini kag nasangit sa jeep rason nga nadulaan siya sang kontrol kag nahulog ang iya mag-iloy.
Natabuan naman nga may nagapadulong nga isa ka willys-jeep kag didto nabunggo pa gid ang mag-iloy nga Roselyn kag Jairon.
Bangud sa mabaskog nga pagkabunggo sang ulo sa mga biktima gilayon nga ginbawian sang kabuhi ang iloy samtang ang bata naman ang ginbawian na lamang sang kabuhi samtang naga padulong sa ospital.
Sa karon padayon pa ang imbestigasyon sang kapulisan sa nasambit nga panghitabo.*
