Natabu ang insidente sa Sitio Tal-ot , Barangay Guadalupe,, las 11:00 sang gab-i,domingo, Agosto 30.
Ginkilala ang lalaki nga si Felipe Fernandez Rojo, legal ang pang edaron kag residente sang Barangay Dolis , banwa sang Calatrava.
Suno sa tag-iya sang puluy-an nga si Rodolfo Alvarez, 62 anyos, tatlo na ka beses nga gintuyo nga sudlon ang iya puluy-an sang kapin lima ka mga wala makilal-an nga mga persona.
Ginsaysay man ni Alvarez, nga ginguba sang mga suspek ang ila pwertahan , samtang sila ang yara sa ikaduha nga panalgan sang ila puluy-an.
Gin-aku man ni Alvarez nga iya ginluthang si Rojo, gamit ang homemade shotgun.
Nakaangkon sang igo sang bala sa ulo si Rojo, nga gintunaan sang iya kamatayon.
Madasig naman nga nakapalagyo ang iban pa nga mga kaupod ni Rojo, antis pa man nga nakapangayo sang bulig ang pamilya Alvarez .
Sa bulig sang mga residente, nadakpan ang isa ka babaye nga ginapatihan kaupod pa sang grupo nga nagsulod sa puluy-an sang mga Alvarez.
Ginkilala ang babaye nga si Edem L. Suico, residente sang Toboso.
Ginpanginwala ni Suico ang akusasyon batuk sa iya.
Gin insister man ni Suico, nga indi niya kilala ang lalaki nga naluthangan.
Suno sa iya, nagbisita lamang siya sa iya abyan nga malapit sa lugar kag nagtalang bangud indi pa niya kabisado ang lugar.
Ginkustodiya na sang kapulisan ang babaye , samtang padayon pa ang imbestigasyon sa kaso.
