Nagasakay sa iya motorsiklo angkas ang iya asawa kag 12 anyos nga bata nga babayi pauli na sa ila nga puluy-an sa Hda. Pula Proper, Brgy. E Lpoez Silay City si Arnold Rivera, 48 anyos may asawa sang ini ang ginpaparahan kag ginpatay.
Sa inpormasyon nga nakuha sang Radyo Bandera, pag-abot ni Rivera sa Bangga Kilometrahe, Hda. Nalinao, Brgy. E. Lopez, Silay City, Negros Occidental alas 5:30 sang hapon, Marso 19, 2020, ini ang ginpaparahan sang duha ka naka motor nga mga suspetsado ang motorsiko nila nga mag-asawa. Didto ginpapanaug sang wala makilala nga mga kalalakinhan ang biktima kag gilayon nga ginmanduan ang asawa kag anak nga babayi nga magdalagan. Sa kakulba nagdalagan man ang mag-iloy samtang ginsipit sang mga armado nga lalaki si Rivera kag gilayon nga ginpaarakan sang wala mahibaluan nga kalibre nga armas luthang.
Patay on the spot si Rivera matapus nga nakaangkon sang madamu nga samad sa likod, ulo kag iban pa nga parte sang iya lawas.
Sa pag-interview sang Radyo Bandera kay Brgy. Kagawad Nelson Arranchado sang amu nga barangay nga tapasero sang tubo ang biktma nga halin sa ciudad sang Sipalay apang nagapuyo na karon sa Silay City.
Indi pa matumod sang mga kapulisan kon ano ang motibo sang pagpatay kay Rivera.
Padayon naman ang ginahimu nga pagpangusisa sang mga kapulisan sa ciudad sang Silay angut sa amu nga insidente.
by: Eljohn Castano
