PASSI CITY– May kabilugan nga P1,915,000 ang balor sang alahas kag cash ang nataban sa guest sang Pintados Resort and Restaurant sa syudad sang Passi.
Ginkilala ang biktima kay Rafail Agcaoili, 62-anyos, presidente sang AESO International Building Corporation.
Suno kay Police Lieutenant Colonel Aaron Palomo, hepe sang Passi City Police Station, natabo ang insidente kahapon, Abril 18.
Sa ila pag-usisa, sang nagbugtaw ang biktima mga las-5:30 sang kaagahon, natalupangdan niya nga wala na ang iya sling bag nga may unod nga P400,000 cash, relo nga nagabalor P1.4 million, kulintas nga P80,000, bracelet nga P50, 000 kag eagles nga singsing nga P6,000.
Pahayag sini, sa bintana sang hotel room nga naga-atubang sa highway nag-agi ang suspek ukon mga suspek nga nangawat.
Padayon pa ang imbestigasyon sang Passi City Police sa amu nga insidente. | via Kabanderang Ralph Mosqueda
