Gin-aresto sang mga otoridad sa Pasig City, ang anak nga nagpatay sa iya kaugalingon nga iloy.
Nasapwan ang bangkay sang iloy sa Norzagaray, Bulacan, matapos nga nag aku sa kremin ang anak kag gintudlo ang nahamtangan sang bangkay.
Ginsaysay sang National Bureau of Investigation (NBI) nga nagba-isay ang mag iloy, tubtub nga ginpasibangdan sang biktima ang suspek nga nagkuha sang kuarta.
Nagkuha naman sang kahoy ang suspek kag ginlampusan sa ulo ang iya iloy.
Ginputos sang anak ang iya iloy sa habol kag plastic, sang mahibaluan nga wala na ini sang kabuhi.
Pilit nga ginsulod sang suspek ang biktima sa sulod sang storage box.
Nagsilbi nga testigo sa kremin ang apo sang biktima kag gintudlo ang iya amay nga responsable sa kremin.
Suno sa menor de edad, iya nakita ang pagpatay sang iya amay sa iya lola.
Nag-aku sa kremin ang suspek kag gintudlo sa mga otoridad ang nahamtangan sang bangkay sa Norzagaray, Bulacan.
Nakuhaan pa sang CCTV footage ang suspek nga nagaguyod sang storage box.
Ginkilala ang suspek nga si Raymond samtang ang iloy naman ginkilala sa kay Ma. Elena Estella Villastique.*
