BACOLOD CITY – Indi pa sa karon makumpirmar sang 303rd Infantry Brigade nga may duha ka mga menor de edad nga gina-alegar mga katapo sang New People’s Army (NPA) nga napatay sa engkwentro sa Barangay Carabalan, siudad sang Himamaylan, Negros Occidental, kaina sang aga, Oktubre 6.
Sa interview sang Radyo Bandera Bacolod kay Army Brigadier General Inocencio Pasaporte, commander sang 303rd IB, wala pa siya nakabaton sang official report sa body count sang mga nagkalamatay sa nasambit nga engkwentro.
Suno sa iya, sa karon, nagapadayon pa ang ila pursuit operation kag nagpahamtang man ang mga ini sang asset sa lugar.
Pahayag pa ni Pasaporte, nakabaton sang impormasyon ang mga katapo sang 94th Infantry Battalion halin sa mga residente sa Brgy. Carabalan nga may yara sang presensya sang mga armado nga grupo sa lugar.
Sang ila ginpadulungan ang lugar agud magpatigayon sang security patrol, ila naka-engkwentro ang indi magnubo sa 40 ka mga armado nga ginapahayag mga miyembro sang Central Negros 2 Front.
Ginapahayag nga nagdugay sang 40 minutos ang nagluntad nga linukpanay.
