Base sa report sang Police Regional Office 6 (PRO6), naglab-ot sa 10,408 ang kadamuon sang kremin nga nagluntad sa bilog nga rehiyon, sa una nga anum ka bulan sang tuig 2022.
Mas manubo ini sang 441 ka mga crime incidents nga nagluntad sang tuig 2021, nga naglab-ot sa 10,849.
Natipon ang datus gikan sa mga lugar sa region 6 nga ginalakipan sang Aklan, Antique, Capiz, Guimaras, Iloilo, Negros Occidental subong man sa highly urbanized cities nga ginalakipan sang Iloilo City kag Bacolod city.
Nagapati si PRO 6 regional director Brigadier General Flynn Dongbo, nga ang pagnubo sang kremin, resulta sang maayo nga pagpakig-angut sang PNP sa mga local government units(LGUs).
Pinaagi sini, mas mapasanyog sang PNP ang ila tikang nga ginahimo agud malikawan ang pagluntad sang kremin sa rehiyon.
Suno sa kapulisan, walo ka mga kremin ang ginatutukan sang mga otoridad sa rehiyon nga ginalakipan sang murder, homicide, physical injury,rape, robbery,theft, carnapping-motor vehicle okon pagpangawat sang motorsiklo kag carnapping okon pagpangawat sang salakyan.*
by: Sunshine Lacson
