Gin-aku ni Bacolod Vice-Mayor El Cid Familiaran, chairman sang Bacolod City Inter-Agency Task Force, nga nagapabilin nga manubo ang kadamuon sang mga luyag magpabakuna para sa COVID-19 vaccine.
Pero dako ang iya pagpati nga sa pagsugod na sang ginapatuman nga Information Education Campaign sang ciudad tubtob sa mga kabarangayan, sarang magsaka ang kadamuon sang mga maluyag na magpabakuna sa madasun nga sinemana.
“Ako personal upod sa pamilya ko mapa-vaccine gid. Ma proteksyunan kita eh, dugang proteksyon sa aton lawas,” pahayag ni Familiaran.
Pasalig pa ni Familiaran, “Ang benefit, ang advantage nga makwa mo magpa-vaccine versus sa indi magpa-vaccine daw ka layo siguro. Beyond compare siguro.”
Kabahin sa mga kabangdanan kun nga-a nagaduha-duha ang pila ka mga indibidwal nga magpabakuna suno sa IATF amo nga nagapili man sang klase sang vaccine ang publiko bangud sang pagpati nga sarang ini makatuga sang side effects sa ikaayong lawas.
Ang ciudad sang Bacolod pinaagi kay Mayor Evelio Leonardia ang nagtukod na sang kasugtanan upod sa AstraZeneca Pharmaceuticals Phils. para sa advance purchase sang kapin P300M nga balor sang COVID-19 vaccine.*Nico Delfin
