Ginsabat ni Punong Barangay Deogracias Donny Dela Vega ang isyu angut sa iya pagpamakal sang kadutaan sa Barangay Alijis, syudad sang Bacolod.
Sa interview sang Radyo Bandera kay Dela Vega, iya ginkumpirmar nga may mga propriedad ini nga ginpamakal kasubong sang duta sa Purok Pag-asa kag Purok Villa Baradas apang iya ginklaro nga personal nila nga kwarta ang gingamit kag indi pondo sang Barangay.
Suno kay Vega ang duta sa Purok Pag-asa ang gin-loan sang iya anak sa Pag-IBIG fund kag ang ginbakal naman sang duta sa Purok Villa Baradas amo ang halin sa bayad sa arendo sang ila 20 ka hektarya nga tubuhan sa siyudad sang Sagay.
Dugang pa ni Dela Vega bilang Punong Barangay naga-sweldo siya sang 32 mil pesos kada bulan kag may anak siya nga OFW.
Ang iban nila nga propriedad ang nabakal bangud nag-loan sila sa Landbank.
Gina-abisuhan naman ni Dela Vega ang mga pumuluyo nga kun may pagdudada, pwede sila nga mag-request sa Commission on Audit ukon COA nga tsekyaron ang kwarta sang Barangay.*
