Kaso sang mala-trangkaso nga masakit sa Pilipinas, nagtaas sang 45% subong nga tuig         

Padayon ang pagtaas sang kaso sang mga masakit nga kaangay sang trangkaso ukon “influenze-like illness (ILI)” matapos ginpahayag sang Department of Health (DOH) nga 45% nga mas mataas ang mga narekord nga kaso subong nga 2023 kumparar sadtong 2022.

Suno sa DOH, 151,375 nga kaso sang “influenza-like illness (ILI)” ang narekord sadtong Oktubre 13. Sa pareho nga panahon sadtong 2022, ang pungsod ang may 104,613 nga mga kaso.

Nagtaas sang 16% ang ILI humalin Setyembre 3 tubtob 16 subong nga tuig.

Nauna na nga ginkumpirmar sang DOH nga nagsaka ang kaso sang influenza kag COVID-19 bangud sa pagbag-o sang temperatura sa tig-ulunan.

Masami nga nagalapta ang virus kun matugnaw ang panahon.*