NEGROS OCCIDENTAL– Patay ang isa ka lalaki matapos ginluthang sa Sitio Tubod, Barangay Macagahay, Moises Padilla, Negros Occidental sadtong adlaw sang Huwebes, Enero 19, 2023.
Ginkilala ang biktima kay Raffy Estorco, ginabulubanta 29-anyos kag residente sang nasambit nga lugar.
Base sa report, takna las-8:30 sang gab-i, Enero 19, nakabaton sang tawag ang kapitan sang Barangay Macagahay nga may ginluthang sa Sitio Tubod.
Gilayon nagpakig-angut ang kapulisan sa Philippine Army sa Montilla Patrol Base agud mag-imbestiga may angut sa insidente.
Suno sa isa ka witness, pagkapanaog sang biktima sa motorsiklo kag magalantaw kuntani sang bulang, gilayon na lang ini ginluthang sang wala pa makilal-an nga suspetsado.
Naka-angkon ang biktima sang igo sang bala sa agtang rason sang gintuna-an sang kamatayon.
Padayon naman ang imbestigasyon sang mga kapulisan may angut sa insidente.*
