Nasalbar ang isa ka bag-o bun-ag nga lapsag nga ginbilin sa hilamonan sa higad sang national highway sa banwa sang Hagonoy, Davao del Sur sang Martes, Oktubre 4.
Suno sa Hagonoy Municipal Police Station, nakabaton sila sang impormasyon halin sa isa ka concerned citizen nga nakakita sa lapsag nga babayi sa Barangay Guihing.
Ginabulubanta nga yara sa duha tubtob tatlo ka adlaw ang lapsag matapos ini ginbun-ag.
Gilayon nga ginkadtuan sang kapulisan kag tinaho sang women and children’s protection desk sang Hagonoy PNP ang lugar kag ila natukiban ang lapsag nga nakabutang sa karton.
Gindala naman sa Davao del Sur Provincial Hospital sa syudad sang Digos ang lapsag nga yara karun sa maluwas nga kahimtangan, sandig sa kapulisan.
Matapos ang mga eksaminasyon, gindala ang lapsag sa Reception Study Center for Children sa syudad sang Davao agud matatapan.
Ginapangita sa karun sang kapulisan ang ginikanan sang lapsag nga posible magpangatubang sang kaso nga kriminal.
Nagadamo naman ang kaso sang mga pag-abandonar sa mga lapsag sa pungsod.
via ABS-CBN
