CAUAYAN, Negros Occidental—Arestado sang mga katapo sang Cauayan Municipal Police Station ang lider mismo sang Epogon Organized crime group sa So Patic, Purok 2, Brgy, Isio, Cauayan, Negros Occidental alas-5:50 ang takna subong gid lamang nga hapon pinaagi sa pagserbe diri sang warrant of arrest.
Ang nadakpan ang ginkilala kay Francisco Epogon alyas “jun-jun”, 30-anyos kag residente sang So Manluy.a, Brgy. San Jose, Sipalay City.
Sa report nga nakuha sang Radyo Bandera si Epogon ang nadakpan sa ginpatigayon nga joint operation sang Cauayan PNP sa pagpanguna ni Police Major Lowell Garingano kag Provincial Intelligence Unit (PUI) sa pagpanguna naman ni Police Major Alvimar Flores by virtue sang iya warrant of arrest sa kaso nga ROBBERY with Violence Against or Intimidation of Persons Commited by a Band, nga gin-isyu sang 6th Judicial Region, RTC 6, Branch 61, Kabankalan City tinalikdan nga Pebrero 28, 2020.
Nagdangat naman sa P100,000.00 ang piyansa nga ginrekomendar para sa iya temporaryo nga kahilwayan.
Samtang, nakuha naman sa posesyon ni Epogon ang isa ka unit sang pineapple type hand grenade nga nakasulod sa iya dala nga backpack.
Sa karon nagapabilin naman ini sa Cauayan PNP sa nagakaigo nga disposisyon.
