BREAKING NEWS!
MARIA RESSA GINPAMATBATAN GUILTY SA KASO NGA CYBER LIBEL
Guilty ang pamatbat sang korte kay Rappler CEO Maria Ressa kag anay researcher-writer sang Rappler nga si Reynaldo Santos sa kaso nga cyber libel.
Ang pamatbat ang ginpaguwa sang Manila Regional Trial Court Branch 46 sa desisyon ni Judge Rainelda Estacio-Montesa.
Base sa desisyon ni Estacio-Montesa, napamatud-an nga guilty beyond reasonable doubt si Ressa kag Santos sa kaso nga ginpasaka sa ila.
Bangud diri, ginmanduan sang husgado ang pagkabilanggo sang mga ini sang 6 ka bulan kag isa ka adlaw tubtob 6 ka tuig nga pagkabilanggo.
Ginmanduan man sang korte ang dowa nga magbayad sang piyansa para sa temporaryo nga kahilwayan.
Ginapabayad man sila sang P200,000 nga moral damages kag P200,000 exemplary damages.
Si Ressa kag Santos ang ginkasuhan sadtong Enero tuig 2019 bangod sa artikulo angot sa negosyante nga si Wilfredo Keng nga imbolbado sa human trafficking kag drug smuggling.
Ginsiling sang prosekusyon nga una nga ginhimo ang artikulo sadtong Mayo tuig 2012 apang liwat ini nga ginpagua sadtong Pebrero tuig 2014 rason nga sakop ini sang Cyber Libel Law.
