Nagpahanumdum ang Philippine Heart Association (PHA) sa mga Pinoy nga maghalong sa mga ginakaon kag gina-inom sa panahon sang holiday season.
Sini nga bulan, masami nga nagatipon ang mga Filipino para sa mga selebrasyon kag diri man nagadamu ang kaso sang heart attack.
Ginpaathag ni PHA Directors Dr. Richard Henry Tiongco II kag Dr. Luigi Pierre Segundo, nga wala sang ginapili ang balatian, pigado man okon manggaranon.
Aminado ang mga doktor, nga sa ti-on sang holidays, mas manami magkaon, nga sa aton paghangop isa ini ka maayo nga bagay.
Pero kon himuon ini sa asud asud nga adlaw kag updan pa sa pag-inom sang makahulubog nga ilimnon subong man pagpulaw, ilabi na gid sa mga wala na sang resitensya sa pagpulaw, mangin problema na ini sa tagsa ka indibidwal.
Ginkumpirmar sang mga doktor, nga nagadamu na ang mga pasyente sa Emergency Room, ilabi na kon maglampas sa tungang gab-i, sa diin nagadamu na ang gina atake sa korason kag nangin biktima sang stroke.
Ginpanugyan sang mga eksperto nga kon magtambong gid man sa mga Christmas parties, kinahanglan indi magkaon sang mga maasin, subong man sang mga fatty foods kag matam-is nga mga pagkaon.*
