Nagsaka sa 114,278 ang kadamuon sang mga indibidwal nga nagpositibo sa flu okon trangkaso sa bilog nga Pilipinas, sini nga tuig 2022.
Sang tinalikdan nga tuig, may yara lamang sang 78,550 ka mga persona nga nagpositibo sa trangkaso, base sa record sang DOH humalin sang Enero 1 tubtub Disyembre 3, 2021.
Suno sa Department of Health okon DOH, mas mataas sang 45 porsyento ang kaso sang flu sini nga tuig, kumparar sa pareho man nga period sang tuig 2021.
Sini nga tuig, 32,778 ka mga kabataan ang nagbatyag sang mga sintoma sang trangkaso , nga naga edad sang isa tubtub apat ka tuig.
Pinakamadamu nga kaso sang flu na record sini nga 2022 sa Davao Region, nga naglab-ot sa 23,177.
Ginsundan ini sang Northern Mindanao nga may yara sang 17,283 ka mga kaso.
May yara naman sang 12,151 ka mga kaso sang flu sa Central Visayas kag 10,922 naman sa CALABARZON.
Ginpanugyan ni DOH officer in charge Maria Rosario Vergeire sa publiko nga maghalong bangud halos pareho lang ang sintoma sang trangkaso sa COVID 19.
Kinahanglan man sang mga nagabatyag sang sintoma nga magpaidalum sa isolation kag eksaminasyon agud makumpirmar kon bala simple lamang nga trangkaso okon COVID 19 ang ginabatyag nga sintoma.*
