Gina kwestyon na ang kalidad sang taytay sa isa ka lugar sa Democratic Republic of Congo, matapos ini nga nag collapsed samtang ginapatigayon ang ribbon cutting ceremony.
Sa isa ka video, nakita ang pag-utod sang guest sa ribbon, nga halos nagdungan sa pagkarusdak sang taytay nga pagabuksan na kuntani sa publiko.
Ginhimo ang bag-o nga taytay agud indi na mag-agi ang mga pumuluyo sa daan nga struktura nga himo sa kahoy, nga masami nagakaguba kag nangin delikado sa mga residente.
Base sa report, may nagakahulog na sa suba bangud sang masami nga pagkaguba sang daan nga taytay.
Masami man nga nagakalubong sa baha ang daan nga taytay gani masami man nga nagaka “stranded” ang mga pumuluyo.
Suno sa mga opisyal, mas maluwas sa katalagman ang mga pumuluyo sa bag-o gintukod nga taytay apang sa ribbon cutting pa lamang nag collapse na ang struktura.
Nasalbar kag nauyatan sa gilayon sang mga security personnels ang babaye kag iban pa nga guest sa ribbon cutting, apang nahulog ang iban pa nga mga bisita sa seremonya.*
