Aksidente nga nalukpan sang iya kaugalingon nga armas luthang ang isa ka miyembro sang Silay City Police Station samtang nagapatigayon ini sang monitoring ukon surveillance sa mga drug personalities sa Sitio Lony, Barangay Mambulac sa ciudad sang Silay, Negros Occidental, tinalikdan nga Martes sang gab-i, Marso 9.
Sa interview sang Radyo Bandera kay Police Major Rollie Pondevilla, hepe sang Silay City Police, ginpahayag sini, nga nahulog ang ginataklos nga armas sang operatiba samtang nagapatigayon ang mga ini sang surveillance.
Naglupok ang service firearm kag nag-igo sa tuo nga paa sang pulis.
Suno kay Pondevilla, nakaasayn bilang isa ka intelligence operative ang Patrolman nga napilasan.
Gilayon nga ginpadangat sa ospital ang nasambit nga pulis apang gin-discharge naman matapos mabulong bangud maswerte nga indi malubha ang iya pilas.
Pahayag pa sang hepe, wala naman sang naigo nga iban nga tawo sang naglupok ang armas sang pulis.
Ginpahanumduman naman ni Pondevilla ang iya mga kapulisan nga maghalong gid ilabi na nga may dala ini sang armas, kag sa ila adlaw-adlaw nga formation wala naman ini nagkulang sa pagtudlo sang insakto nga paghandle sang ila service firearm.*
– with reports from Kabanderang Jinn Siatita
