Isa ka nagabusong nga babayi ang nagbata sang baby boy sa quarantine facility sa ETCS4 sa ciudad sang Bacolod samtang nagahulat sang iya swab test result antes ini kuntani makapa-admit sa hospital agud magbata, suno sa post ni Bacolod Councilor Cindy Tan-Rojas.
Ang bata nga ginpangalanan sang iya iloy nga “Gabriel,” ang premature.
Sa karon, ang nanay ang gindala na sa isolation room sang Dr. Pablo O. Torre Memorial Hospital pending sang iya swab test result, samtang si baby Gabriel ang yara sa NICU (Neonatal Intensive Care Unit) sang ospital.
Ginakabig ni Rojas nga miraculo ang natabo bangud ang tatlo niya ka mga staff nga na-assign sa ETCS4 kag nagbulig pabata sa iloy ang wala sang medical training apang ila nabuligan nga mabun-ag si baby Gabriel.
“Another quarantine miracle that shows us that indeed God is good. Good job Team Rojas (Glenda,Flaviana, and Yvonne), to all the nurses and Team DSSD,” suno kay Rojas.*
