RIZAL – Gindakup ang isa ka babaye nga nagpakilala bilang event organizer sang ginreklamo ini nga ‘missing in action’ ukon nadula matapos makuha ang bayad halin sa iya nga mga kliyente sa Rizal.
Ginkilala ang suspek kay Melanie Tabermejo, 42-anyos nga gin-aresto sang mga operatiba sang Philippine National Police-Criminal Investigation and Detection Group (PNP-CIDG) Rizal Provincial Field Unit.
Suno sa mga kapulisan, ginreklamo si Tabermejo sang iya nga mga kliyente bangud gindalagan niya ang kwarta nga ginabayad sa iya para sa downpayment bilang event organizer.
Yara naman sa 30 ka mga indibidwal ang nagareklamo batuk kay Tabermejo kag nagabalor sa P4 million ang nakuha sang suspek halin sa iya nga mga biktima nga gikan sa Region IV-A, Metro Manila kag Central Luzon.
Ginpanginwala naman sang suspek ang akusasyon batuk sa iya.
