BACOLOD CITY– Sandig sa datus nga ginpresentar sang Provincial Health Office (PHO) sa ginpatigayon nga press conference kahapon, Disyembre 1, yara sa ika-tatlo ang Negros Occidental sa may pinakamadamo nga kaso sang Human Immunodeficiency Virus (HIV) sa bilog nga Region VI.
Base naman sa report sang PHO, humalin 1986 tubtob Setyembre sini nga tuig nagdangat na sa 1,176 ang kaso sang HIV sa probinsya.
Nagapanguna naman sa pinakamadamo nga kaso ang probinsya sang Iloilo nga may 1,410 samtang ang siudad sang Iloilo ang nagdangat sa 1, 211 ka kaso.
Sa subong nga tuig, humalin Enero tubtob Setyembre yari ang estado sang kaso sang HIV:
Probinsya kag Siudad sang Iloilo- 210 cases / 92 cases
Negros Occidental- 176 cases
Capiz- 106 cases
Bacolod City- 101 cases
Aklan – 71 cases
Antique – 48 cases
Guimaras- 14 cases
Suno kay Arnulfo Makilan, nagapadayon ang ila ginahimo nga awareness campaign bangud madamo sa mga LGBTQ community ang luyag mag-pa HIV test.
Suno naman kay Provincial Health Officer Dr. Ernell Tumimbang kalabanan nga rason sang transmission nagikan sang male to male partner.
Dugang pa ni Dr. Ernell Tumimbang tatlo ka mga ospital sa probinsya ang nagatanyag sang libre nga HIV testing.
Nalakip sa mga ospital amo ang Cadiz District Hospital sa Northern Negros, Corazon Locsin Montelibano Memorial Regional Hospital sa Bacolod City kag Lorenzo Zayco District Hospital sa Kabankalan City.*
