WESTERN VISAYAS –Gin-anunsyo sang DSWD Field Office VI nga ila sa gihapon hugot nga igapatuman ang ‘no walk-in policy’ sa assessment kag pay-out sang Educational Assistance sa pala-abuton nga Sabado, Setyembre 24.
“Magkadto lamang sa nakatalana nga petsa kag lugar sa tion nga makabaton sang text message ukon email halin sa DSWD bilang kompirmasyon sa pagkuha sang nasambit nga ayuda,” suno sa post sang DSWD-6.
Sa nabilin nga P19 Milyones nga pondo sang DSWD sa Western Visayas, may 7,105 lamang ka mga benepisyaryo ang makabaton sang ayuda sa bilog nga rehiyon sa Setyembre 24.
Nagapanguna ang Negros Occidental sa may pinakamadamo nga target nga mahatagan sang Educational Assistance. May 1,571 ka mga benepisyaryo sa probinsya ang magabaton sang ayuda.
Samtang, 537 naman ka mga benepisyaryo sa Bacolod City ang magabaton sang educational assistance sini nga Sabado.
