Liwat nga nagpungko bilang pinuno sang Land Transportation Office (LTO) Bacolod si Mr. Renato Novero matapos ang ginpatigayon nga reshuffling.
Sa interview sang Radyo Bandera Bacolod, ginsiling sini nga apat ka mga district offices sang LTO sa Negros Occidental ang naapektuhan sa nasambit nga reshuffling nga amo ang Cadiz, EB Magalona, Bacolod, Pontevedra kag Himamaylan City.
Samtang wala naman natandog ang bahin sang Sipalay, San Carlos kag ang satellite office sini sa Ayala Mall.
Gikan sa Himamaylan City, ginbuslan si Novero ni Juliet Alipuon nga nagikan sa Pontevedra kag ginbuslan naman ini ni Marilyn Desuyo nga naghalin sa siudad sang Cadiz.
Nagpungko naman bilang head sang LTO sa Cadiz amo si Mr. Joseph Danoy nga naghalin sa Bacolod District Office. Samtang si Mr. Reuben Tampos nga anay pinuno sang LTO Bacolod ang ginsaylo naman sa banwa sang EB Magalona.
Suno kay Novero, sa iya liwat nga pag-assume sa posisyon, prayoridad sini ang pagsaylo nila sa bag-o nga opisina sa Barangay Mansilingan.
Pahayag sini, indi pa ospisyal nga ginturn-over sa ila ang nasambit nga building rason nga indi pa nila ini magamit apang suno sa iya, yara na sa 95% ang konstruksyon sini.
Dugang pa sini nga sa karon, iya nga gina-inventory ang mga equipment kag mga personnel sini kun ano ang kulang kag kun dapat bala dugangan ukon buhinan.*
