Temporaryo anay nga indi maka-serbisyo ang mga empleyado sang Land Transportation Office-Bacolod matapos ini ang ginsirad-an para sa disinfection.
Ini matapos nga ang isa sa ila mga staff ang ginpaidalom sa swab test kadungan sang ginapatuman nga contact-tracing.
Suno kay Reuben Tampos, tagpamuno sang LTO-Bacolod, ang amo nga staff ang naka-upod sang pulis nga nagpositibo sa COVID-19 sa isa ka deputization seminar sa ciudad sang Himamaylan sang nagligad nga semana.
Sa miyerkoles natalana magabalik sa trabaho ang mga empleyado sa liwat nga pagbukas sang LTO-Bacolod office.
Sa pihak nga bahin, nagapabilin nga temporary closed ang Provincial Administrator’s Office makaligad nga naglab-ot na sa pito ang nagpositibo sa COVID-19 sa amo nga opisina. Nagligad nga semana sang una nga nagpositibo sa COVID-19 ang RT-PCR test result sang isa sa mga staff rason kun ngaa temporaryo nga ginsirad-an ang Provincial Administrator’s Office kadungan sang ginpatuman nga contact-tracing kag disinfection.*
