Gin-aprubahan ni Department of the Interior and Local Government (DILG) spokesman Undersecretary Jonathan Malaya ang pagbalik sa tuigan nga tradisyon sang ‘caroling’ sa National Capital Region, nga matandaan ginpanubo sa Alert Level 2.
Base sa DILG mas mangin malipayon ang Kapaskuhan para sa mga residente sang NCR kung pahanugutan ang ‘outdoor caroling’.
Wala naman sang nakita nga problema si DILG spokesperson Undersecretary Jonathan Malaya kung ibalik ang tradisyon sang pagpangaroling apang nauna na nga gintugutan nga magbukas ang mga videoke bars, apang kinahanglan sa giyapon magsunod sa mga pagsulundan kaangay sang 50% nga kapasidad kag mga fully vaccinated lang ang pwede pasudlon.
Ginsiling man sini nga wala gin-sambit sa mga regulasyon sang Inter-Agency Task Force for the Management of Emerging Infectious Diseases (IATF) nga dapat ibawal sa idalom sang Alert Level 2 ang caroling.
Gindilian ang caroling sadtong isa ka tuig agud malikawan ang pagtaas sang kaso sang coronavirus disease (COVID-19) sa panahon sang Kapaskuhan.
