BACOLOD CITY– Nangin madinalag-on ang pagbukas sang Masskara sa Panaad kahapon nga adlaw sang Lunes, Oktubre 10, 2022.
Hugot nga seguridad ang ginpatuman sa lugar samtang naga-libot naman ang mga guwardya kag kapulisan sa bilog nga Panaad Park and Stadium.
Ginsugudan ang nasambit nga selebrasyon pina-agi sa isa ka misa nga gintambungan nanday Governor Eugenio Lacson, Provincial Administrator Atty. Rayfrando Diaz II, Association of Chief Executives President kag Victorias City Mayor Javier Miguel Benitez kag nagkalain-lain nga mga Local Chief Executives sa probinsya nalakip na si Bacolod City Mayor Albee Benitez.
Ginsundan ini sang Parade of Festivals kun sa diin nagpasundayag ang mga nagkalain-lain nga mga festival dances sang mga banwa kag siyudad sa probinsya.
Nagpakita naman sang ila suporta ang mga Local Chief Executives kag mga Tourism Officers sa tagsa ka mga banwa kag siyudad sa ginpatigayon nga Presentation of Colours and LGU Banners.
Ginpanginbulahan ni Governor Lacson si Mayor Albee, ang Yuhum Foundation kag ang tanan nga mga city officials sang Bacolod sang isa ka madinalag-on nga selebrasyon sang Masskara Festival 2022.
Malipayon man si Governor Lacson bangud nangin kabahin ang probinsya sa selebrasyon sang Masskara.
Dugang pa ni Governor Lacson, isa ini ka oportunidad agud mapakita ang kultura, mga produkto, festivals, travel destinations, kag mga pagkaon kag delicacies sang mga Negrense.
Suno naman kay Mayor Albee, ang pagkalakip sang probinsya sa Masskara Festival ang isa ka patima-an nga nag-ugyon na ang Bacolod City kag Negros Occidental para sa ika-ayo sang mga pumuluyo.*
