Pila ka mga world leaders, international organization kag mga senador ang nagpanginbulahan sa pagdaog sang Nobel Peace Prize ni Maria Ressa, nga isa ka Pinay journalist, sini nga tuig.
Sa isa ka statement, ginpahayag ni US President Joe Biden nga si Ressa, nga CEO sang online news organization nga Rappler, kag si Russian journalist Dmitry Muratov ang maisog kag “tirelessly” nga nag-obra agud pangitaon ang kamatuoran.
Sanday Ressa kag Muratov ang nagdaog sang Nobel Peace Prize sini nga tuig bangud sang ila hinimuan agud maprotektahan ang hilway nga pagpahayag, nga amo ang kinahanglanon para sa demokrasya kag kahilwayan.
“They have worked to check the abuse of power, expose corruption, and demand transparency. They have been tenacious in founding independent media outlets and defending them against forces that seek their silence,” suno kay Biden.
Ginpanginbulahan man si Ressa sang human rights group nga Amnesty International, European Union mga pila ka mga senador sa pungsod Pilipinas.
Sa nagkalain-lain nga statements, ginpanginbulahan nanday Senators Panfilo “Ping” Lacson, Grace Poe, Richard Gordon, Francis Pangilinan kag Leila De Lima ang nalab-ot ni Ressa.
Magluwas sa prestihiyoso nga award nga nabaton ni Ressa bilang pinakauna nga Pinoy nga nahatagan sang nasambit nga dungog, amo ang responsibilidad nga ipadayon nga isulong ang hilway nga pagpabutyag.
Suno naman kay Poe si Ressa ang icon sang journalismo indi lang sang pungsod kundi pati na sang kalibutan.
Samtang, suno kay Pangilinan, ang pagdaog ni Ressa ang isa ka maragtas kag kadalag-an batuk sa mga nagapalapta sang fake news.
Ginpanginbulahan man ni Gordon si Ressa sa iya pagtindog sa press freedom batuk sa mga “tyrants” kag “evildoers.”
Ang pagkadaog ni Ressa ang tampa sa guya sang administrasyon ni Presidente Rodrigo Duterte, suno kay De Lima.*
