Pilason si Gino Inventor, alyas “Peter Pan,” matapos natiruhan sang mga kapulisan sang ini ang gin-alegar una nagpalupok kag nalagyo sakay sang iya motorsiklo sa ciudad sang Bacolod.
Nagkasa sang buy-bust operation ang mga katapu sang City Drug Enforcement Unit batuk kay Inventor, nga ginakabig High Value Individual, sa Alijis Road, Barangay Alijis sa ciudad sang Bacolod, takna las 6:15 sini nga gab-i, Pebrero 25.
Suno sa team leader sang CDEU, madasig ang transaksyon kay Inventor, nga nagdagdag lang sang “items” nga ibaklon kuntani sang “poseur-buyer.”
Apang sang na-mutikan niya nga mga pulis ang nagapalapit na sa iya, nagbunot ini sang armas luthang kag nagpalupok sa mga operatiba.
Wala naman sang naigo sa hanay sang mga kapulisan, suno sa team leader.
Sa pihak nga bahin, nag-retaliate ang mga kapulisan agud i-neutralize kuntani si Inventor, nga sakay sang iya motorsiklo, apang ini ang natiruhan sa iya nga tiil.
Nagdangat sa Barangay Taculing ang nilagsanay sang mga pulis kag ni Inventor, kon sa diin siya natiruhan.
Gindala man sang mga pulis si Inventor sa ospital.
Nakuha sa iya ang 12 ka sachets sang ginasuspetsuhan shabu, isa ka .38 caliber nga revolver, isa ka fired cartridge sang .38 caliber, tatlo ka bala, P5,000 nga marked money, kag ang Yamaha Aerox nga motorsiklo.
Ginabulubanta 100 gramos ang narekober nga ginasuspetsuhan shabu kay Inventor kag ini ang nagabalor P680,000.*
