Masuwerte nga nakaluwas ang isa ka pulis matapus ini nga gin-ambush alas 11 sang aga, Dominggo malapit sa Camelot Subdivision, Brgy. Estefania, Bacolod City.
Sa investigasyon sang mga kapulisan sang Police Station 4, nga nagsakay sa iya Toyota Wigo si PO3 Miguel Perez sang ini ang gin-ambush gamit ang M-16 armalite rifle basi naman sa narecover nga mga empty shells sa crime scene.
Tadtad sang bala ang iya salakyan apang nakatigayon nga nakakuob si Perez sang ini ang gin-ambush kag nakaangkon sang indi malubha nga samad. Gilayon naman nga nagpalagyo ang mga suspek sa wala mahibaluan nga direksyon matapus ang insedente.
Sang maglabay ang isa ka tricycle dalidali nga naggua sa salakyan ang duguon nga si Perez kag nagsakay kag magpangayo sang tabang sa pinakamalapit nga puluy-an.
Gilayon naman nga gindala sa Riverside Medical Center ang biktima agud nga madapatan sang nagakaigo nga pagbulong.
Sa nahibaluan nga nagserbisyo si Perez bilang miembru sang Police Station 3 sa pagpanguna ni PSupt. Alexander Ermeo apang na transfer ini sa NCR kag nagbalik sa serbisyo sa provincia sang Negros Occidental bilang miembru sang legal department sadtong Disyembre sang nagligad nga tuig.
Padayon pa ang pagpangusisa sang mga kapulisan sa nsambit nga insedente.
