BACOLOD CITY – Makabaton ang mga estudyante sa public elementary schools sa Bacolod City sang libre nga school supplies gikan sa ciudad sa tion nga ma release na ang pondo, suno kay Councilor Al Victor Espino, Chairman sang Committee on Education.
Ang nasambit nga ordinansa nga magahatag sang “Free Educational Materials to all students of Public Elementary Schools in Bacolod” ang gin author ni Atty. Caesar Distrito nga sadtu anay konsehal sang Bacolod nga malawig na nga gina-implementar kag nauntat lang sa panahon sang pandemya kun sa diin temporararyo nga gin suspende ang face-to-face classes.
Dugang pa ni Councilor Espino nga magapa-in ang ciudad sang ₱15 million para sa programa sini nga tuig, nga nakabutang sa ordinansa nga gin aprobahan sang Bacolod Sanggguniang Panlungsod sadtung 2016.
Duha ang posible nga pagakuhaan sang pondo – ang Special Education Fund kag General Fund para indi na mangin problema sang mga ginikanan ang school supplies para sa ila mga kabataan sa pagbukas sang klase.
Sa madumduman, ini anay ang ginhimo na sang nagligad nga administrasyon kun sa diin naka panghatag sang 68,000 ka bags sa 46 ka public elementary schools sa Bacolod.
Nakabaton ang tagsa ka mga benepisyaryo sang 1 Backpack, 2 Notebooks, 2 Ballpens, Papers, Crayons kag isa ka ruler, tanan nagabalor sa indi magnubo 11 milyones pesos.*
