Kapin 200 ka mga miyembro sang BACOD ukon Bacolod Alliance for Commuters, Operators and Drivers Incorporated nagpatigayon sang rally sa Bangga Cory kag area sang Lopues East sa siudad sang Bacolod subong nga Lunes, Marso 6, 2023, suno sa ila presidente nga si Rudy Catedral.
Panawagan sang grupo nga pamatian kag buligan sila ni Bacolod Mayor Evelio Leonardia agud nga indi ma-phaseout ang traditional jeepney sa siudad bangud madamo sang kabataan ang mga drayber nga magutman kung wala na sila sang palangabuhian.
Suno sa Land Transportation Franchising and Regulatory Board (LTFRB) extended tubtob Disyembre 31, 2023 ang validity sang provisional authorities ukon prangkisa nga magapahanugot sa mga individual operators nga magbiyahe sang traditional jeepneys.
Agud sa sini nga tion, mahatagan sang dugang nga oras ang mga individual operators nga magasulod sa mga corporations ukon kooperatiba.
Matapos san extension, magapangdakup na ang LTFRB sang mga jeep nga expired ang prangkisa.
Gani, suno kay Catedral, makapila na sila ka beses nga nagtinguha nga makigsapol kay Mayor Benitez apang wala sila mahatagan sang kahigayunan.
Ang mga naga-rally sa Bangga Cory kag sa Lopues East ang magatabo karon sa Bacolod City Government Center agud ipakita ang ila pwersa kag pagpamatok sa PUV modernization.
Ginklaro naman ni Catedral nga subong lang sila nga adlaw maga untat-biyahe.
May 29 na ka mga routa ang Bacolod sa idalum sang LTPRP ukon ang Local Public Transport Route Plan.*
