Nagahigda na sa kaugalingon nga dugo kag wasak ang bagol sang 40 anyos nga lalaki matapos gintiro ang kaugalingon bangod sa problema sa kwarta nga natabo sa likod sang Palm Haven sa bahin sang Purok Kabugwason, Barangay Vista Alegre.
Base inisyal nga imbestigasyon sang kapulisan, ala 1:00 sini nga kaagahon, nagkandus sang tubig halin sa suba ang ka live-in partner sang biktima sang hinali nalang ini nakabati sang lupok sa sulod sang ila balay sa diin, nahamtang man ang haya sang iloy sang biktima nga napatay.
Suno kay Police Station 7 commander Captain Elmer Bonilla sa interview sang Radyo Bandera nga nakita sa sulod sang kwarto ang biktima sang iya nga asawa nga tupad ang sulpak nga gingamit sa iya paghikog kag ginsulod sa iya nga baba kag ginpalupok nga nagresulta sa pagwas-ag sang iya nga bagol.
Suno sa ka live-in sang biktima, ginapatihan nagasuprer sang depresyon ang biktima bangod sa problema sini sa kwarta kag sa iya nga pamilya.
Nakatalana kuntani ilubong karon nga hapon ang iya nga iloy apang bangod man sa kapigaduhon, nagpamroblema ang biktima sang kwarta sa nabilin nga balayran sa punerarya kag mga galastuhan sa pagpalubong sang iya nga iloy.
Sa karon, padayon pa ang imbestigasyon sang Police Station 7 kag SOCO team sa lugar sang insidente.
