Nagdangat na sa 13 ka mga indibidwal ang napatay bangud sa acute gastroenteritis sa syudad sang Iloilo, suno sa ginpaguwa nga datus sang City Epidemiology and Surveillance Unit ukon CESU sang Martes, Setyembre 20.
Humalin Hulyo 26 tubtob Setyembre 20, nagdangat na sa 637 ang kaso sang acute gastroenteritis kag cholera sa nasambit nga syudad, kalakip ang 19 ka mga bag-o nga kaso kag 30 ka mga aktibo nga kaso.
Nakatalana nga magahatag sang bakuna batuk cholera kag gastroenteritis ang Iloilo City Health Office sa mga barangay sa syudad nga may mataas nga kaso sang waterborne diseases.
Agud mabuligan ang mga indibidiwal nga may sakit nga acute gastroenteritis kag cholera sa syudad, ginlunsar sang Regional Finance Service Office sang Police Regional Office 6 (PRO-6) ang “Strengthening Barangay and Police Partnership Against Cholera.”
Magabaton sang food packs, vitamins kag bulong halin sa RFSO 6 ang mga may acute gastroenteritis kag cholera sang Barangay Zamora Melliza.
Nagapanguna ang Barangay Zamora sa may pinakamadamo nga narecord nga kaso sang acute gastroenteritis kag cholera sa syudad sang Iloilo.
