Maswerte nga nasalbar sang katapo sang kapulisan sang 2nd Davao Sur Provincial Mobile Force Company (DSPFMC) ang 2 ka tuig nga bata nga wala na nagaginhawa samtang ginakugos sang iya nga amay sa dalan sang Davao City.
Ang mag amay ang nagabantay sang salakyan pauli sa Tagum City samtang ang mga pulis naman ang pabalik na kuntani sa ila kampo sa Davao del Sur sang ila nakita ang amay sang bata nga daw indi mapakali, nagahilibion kag nagasinggitan sang bulig samtang ginakugos ang bata sa dalan.
Nagpalapit ang kapulisan sa mag-amay kag didto natukiban nga wala na nagaginhawa ang bata matapos nahilanat kag wala maayo nakakaon.
Bangud sini, gin buligan sang kapulisan ang mag-amay sa diin ila ini ginpasakay sa ila nga patrol car para dal-on sa Southern Philippines Medical Center (SPMC).
Samtang, nagabiyahe, ang bata ang gin-CPR sang pulis nga ginkilala kay Patrolman Kenneth John Sabuga-a kag didto maswerte nga nakarekober ang bata.
Dako ang pagpasalamat sang amay sang bata tungod sa maayo kag aktibo nga pagresponder sang kapulisan para lang mabuhi ang bata.
Sa karon, naka-admit na ang bata sa Southern Philippines Medical Center kag padayon nga gina-monitor ang sitwasyon sini.
