Ginpahayag ni Mayor Salvador “Bading” Escalante nga mabuhinan sang 15 porsyento ukon 220 milyon ka pesos ang annual budget sang siyudad sa tuig 2023.
Suno kay Mayor Escalante, ang pagnubo sang tax collection sang gobyerno nasyunal tuga sang COVID-19 pandemic ang rason sang pagbuhin sang parte sang mga Local Government Units (LGU) halin sa National Tax Allotment ukon NTA.
Dugang pa ni Escalante, antis ang pagbuhin sang NTA sang siyudad, ginplastar man sini nga pagabuhinan sang P111 milyon ka pesos ang 20% Development Fund sang mga development projects sang siyudad.
Ginpahayag man ni Escalante nga dako ang epekto sang nabuhin nga P220 ka milyon sang NTA sang siyudad, apang isa nga ginalantaw nila nga pamaagi agud maka survive amo ang pagtutok sa local collections sang siyudad.
Suno sa alkalde, sandig sa datus sang Northern Negros Electric Cooperative (NOCECO), sumugod sang tuig 2010 tubtob 2022 nagdangat na sa 8,500 ang nahatagan sang kooperatiba sang electrical permits, nga isa ka patimaan nga mataas ang kumpiyansa sang business sector sa siyudad.*
by: Randy Coronel
