BACOLOD CITY – Nagakatulog samtang nagapungko ang anay priso sa tricycle nga yara sa higad sang dalan sang ini ang gintiro-patay sang motorcycle-riding suspects sa Purok Adarna, Barangay 16 sa syudad sang Bacolod, Biyernes sang ugto, Nobyembre 25, 2022.
Ginkilala ang biktima kay Mark Christian John Luceño, alyas “Badjao,” 31-anyos, kagresidente sang Barangay 35 sa Bacolod.
Isa ka lupok ang nabatian sang mga residente sa lugar.
Inisyal nga may igo sa ulo si Luceño.
Nagpadulong sa crime scene ang iloy ni Luceño nga si Angela Luceño, 55-anyos kag ang ikaduha sini nga asawa. Nagtyabaw ang iloy kag asawa sini sang nakita ang ila himata nga wala na sang kabuhi.
Suno kay Angela, nakaaigi priso si Luceño sa kaso nga robbery apang madugay naman nga nakagwa ini sa prisohan.
May plastaran sang green shell ang pamilya Luceño kag diri sila nagakuha sang ila pang-adlaw-adlaw nga panginahanglanon.
Ulihi nga nakita ni Angela ang iya bata kaina las 9:00 sang aga.
Suno sa iya, wala man sang pagpamahog nga nabaton si Luceño apang ini ang nagagamit sang iligal nga droga.
May apat ka mga kabataan si Luceño, tatlo diri ang sa una niya nga asawa kag isa sa ikaduha nga asawa.
Ginprocess man sang SOCO ang crime scene kag ginkuha ang bangkay sang biktima.*
