BACOLOD CITY – Dead on spot ang driver ka trailer truck kag kaupod sini nga helper sang makuryente sa linya ka NONECO nga aksidente nila nasangit sa higad sang dalan.
Natabo ang insidente mga las 11:30 sang ugto, Biyernes, Nobyembre 25, 2022 sa may Access Road, Purok Kalong Kalong, Diversion Road, Barangay Cabahug, syudad sang Cadiz, Negros Occidental.
Ginkilala ang driver nga si Eddie Dejito, 49-anyos, residente ka Hda. Caridad, Brgy. Rafaela Barera, Sagay City, samtang ang helper naman amo si Ronnie Antojado, alyas “Kalbo,” 26-anyos, residente sang Brgy. Balintawak, Escalante, suno sa report sang kapulisan.
Suno sa mga naka saksi, nakita na lamang nila nga yara na sa guwa sang truck ang duha ka biktima kag wala na sang kabuhi.
Samtang yara ayon sa ulohan nga bahin ka truck ang linya ka kuryente nga nautod, nga posible nasangit sang ila nga salakyan matapos tuyo kuntani mag pahigad sa dalan.
Gilayon naman nga gintawagan ang mga otoridad agud makuha ang duha ka biktima.
Gindala pa sa Alfredo Marañon Sr. District Hospital ang driver kag helper apang gindeklarar nga dead on arrival.
Sunog ang pila ka parte sang lawas ka mga biktima nga indikasyon nga masyado ka taas sang boltahi nga naglatay sa ila sini kalawasan.
Sandig naman sa imbestigasyon sang kapulisan, na-sideswipe sang truck ang kuryente sang NONECO nga nagaluyloy sa higad sang dalan.
Nanaug ang driver kag ang helper agud kuntani nga i-check apang sila ang nakuryente.*
(with reports from 89.7 Radyo Bandera Sweet FM North Negros)
