Gindakup sa isa ka entrapment operation ang isa ka call center agent matapos ginreklamo sang isa ka 19-anyos nga babayi sa Moonlight Inn, Goldenfield Commercial Complex sa Barangay Singcang-Airport sa syudad sang Bacolod, takna las 7 sini nga gab-i, Martes, Oktubre 11, 2022.
Ginkilala ang nadakup nga suspek kay Dennis James Traza, 24-anyos, isa ka technical support call center sa isa ka call center firm, suno sa report sang kapulisan.
Nakuha kay Traza ang isa ka Vivo nga cellular phone nga may unod nga mga nude video kag picture sang biktima.
Ginreklamo sang babayi nga biktima si Traza sa kaso nga sextortion, grave threat kag acts of lasciviousness.
Sa interview sang Radyo Bandera Bacolod kay Police Station 8 commander Police Major Joery Puerto, iya ginpahayag nga nagreklamo sa pulis ang babayi nga ini ang gina-blackmail kag gina-threat sang suspek nga kung indi ini magpasugot nga mag-check in sa lodging house, ipalapta sini ang iya mga nude videos kag photos.
Gani, nagkasa sang entrapment operation ang utoridad batuk sa suspek.
Nahibaluan nga nagkilalahay ang biktima kag ang suspek sa dating app. Naglaum ang biktima nga foreigner ang lalaki bangud kay naga-english-english ini.
Nangayo ang lalaki sang nude videos kag photos sang biktima kabaylo sang kwarta. Apang nahibaluan sang biktima nga indi gali foreigner ang lalaki.
Sa ginpatigayon nga entrapment, nanaug sa jeep ang suspek sa City Mall tubtob nga sila ang nag-meet up kag ini ang ginpahog sang suspek nga macheck-in sa lodging house agud didto kuntani i-delete ang mga nude photos kag videos.
Naka-detain karon sa custodial facility sang Station 8 ang suspek.*
