Gina-alegar nga namuyayaw kag may dala nga armas-luthang si Bacolod City Councilor Al Victor Espino sang nagsulong ini sa Bacolod Traffic Authority Office sa compound sang Bacolod City Police Office takna las 5 sang hapon, Miyerkules, Oktubre 18.
Base sa pagpangusisa sang Radyo Bandera, sadtong Martes, Oktubre 17 sang may nadakpan nga duha ka estudyante sa siudad sang Bacolod bangud wala ini sang helment kag driver’s license rason nga gin-impound ang motorsiklo sa BTAO compound.
Sang Miyerkules sang aga, Oktubre 18 gilayon nga ginproseso sang estudyante ang pagkuha sang iya motorsiklo sa BTAO compound.
![](https://i0.wp.com/radyobandera.com/wp-content/uploads/2023/10/Untitled-design-31.png?resize=1024%2C576&ssl=1)
Apang nakibot na lamang ang mga BTAO personnel nga gilayon na lamang gindala pagguwa sang estudyante ang motorsiklo nga hapos lamang ma-operate bangud ini ang may yara sang automatic system.
Ginpabalik sang BTAO personnel ang estudyante kag ginapahayag sini nga may ginbayran siya nga P1,500 sa isa ka BTAO personnel agud ma-clear na ang iya nga motorsiklo.
Apang sang gin-usisa ni Liba ang ila system kag wala nila natumod ang ginalaragway sang estudyante nga BTAO personnel nga iya ginbayran sang kwarta.
Matapos ang pila ka minutos, may duha ka babayi ang nag-abot kag gintransakyon ang estudyante agud maggawad ang iya nga motorsiklo.
Nahibalu-an man nga nagpangayo sang bulig ang tag-iya sang motor sa konsehal.
Matapos sini, gilayon nga nag-abot si Espino sa BTAO compound kag didto na ini nga gin-alegar nagsinggit sang, “Y******a ngaa file-lan ka kaso nga carnap kay imo na motor!”
Gilayon naman nga ginpunggan sang building administrator nga si Abner Salvallon si Espino nga magsulod sa opisina bangud wala sini nakilal-an ang konsehal kag ginpamangkot kun ano ang problema.
Didto na nga gin-alegar nagsinggit si Espino nga indi siya paghikapon bangud indi sila miguhay sang building guard kag gin-alsa sini ang iya nga polo agud nga ipakita ang sukbit nga armas-luthang sa iya nga hawak.
Sang makasulod na si Espino sa opisina, didto na ini nga gina-alegar nagsinggitan kag kag namuyayaw agud pamangkuton kun ngaa pagasakaan sang kaso nga carnapping ang tag-iya sang motorsiklo nga na-impound.
Ang ini nga mga pahayag ang ginbuyagyag ni Salvallon sa isa ka press conference nga ginpatawag ni BTAO head Major Junji Liba kaina sang aga.*